Churchil Naudé is ’n selfgeleerde rymkletser en digter van Mitchell’s Plein wat homself as ’n Woordenaar beskou. Sy kuns is nie ’n tipiese straataanslag nie; dit is ’n diep digterlike ontleding van die samelewing, deurspek met politieke skerpte, geestelike diepgang en ’n rou, eiesoortige humor. Vir Naudé is die skeppingsproses ’n konstante jagtog na die "beter woord" om die gedagtes wat in sy gees ronddwaal, met presisie vas te pen.
As die dryfkrag agter sy eie eenmanveldtog, #dieontkakkingsveldtog, staan hy alleen. Hierdie veldtog het geen lede nie en hy preek vir niemand nie; dit is ’n nugter oproep tot selfrefleksie. Sy filosofie is eenvoudig: ons loop almal rond met "kak in die kop" en niemand gaan jou hand vashou of jou soebat nie—jy moet jouself ontkak.
Sy statuur as een van Suid-Afrika se mees deurdagte stemme word onderskryf deur sy werk saam met legendes soos David Kramer, Koos Kombuis, Spoegwolf, Hunter Kennedy en Riku Lātti. In September 2025 is sy bydrae bekroon met die Neville Alexander prestige-eerbewys.
Met drie albums—Kroeskop vol Geraas, Kroesifaaid, en Vir my ma se kinners—asook sy digbundel, Drol innie Drinkwater, bewys Churchil Naudé dat woorde nie net dryf nie, maar dat ’n ware Woordenaar dit kan inspan om die gemors in ons koppe oop te krap.
------ nog so paar dinge van Churchil ------
Koos Kombuis oor Churchil: “My gunsteling-rap-ster is ’n kalant van Mitchells Plain met die naam Churchil Naudé (met een “l” om hom van Winston Churchill te onderskei). Hierdie ou kan nog groot gaan in ons taal se musiek; groter as Jack Parow, so groot soos Tafelberg.”
Churchil het onlangs met Anton Goosen saamgewerk. 'n Kollaborasie wat op kykNet se TV program met Coenie de Villiers te sien was en nou op die web is by:
Van sy vroeër werk het veral aandag getrek op MK (Musiek kanaal op sateliet TV):
Churchil se woorde word as uitstekende poëtiese tekste beskou, wat nie wegskram van belangrike sosiale kwelpunte nie, dog is dit gemik op 'n alledaagse gehoor en hoogs verstaanbaar.
“Verdriet is 'n guava juice bottel en genkem/ verdriet is us en them/ of dis my stem/ wat jy gaan hoor tot julle my tong uitsny met 'n lem/ steel die ink in my pen/ maar die liefde gaan wen/ tot iemand my tyres pap steek/ en ek my wind uitblaas/ maar ou melk raak kaas/ die boy raak 'n baas/ hulle sê hulle is moeg vir my gekerm want ek maak net geraas/ maar daai bliksems kan gaan doppies blaas
"Churchil se lirieke raak `n verskeidenheid onderwerpe aan. Hy rap oor iets so werklik kwellend soos die kultuur van huishoudelike geweld in ons land in sy treffer "Meisie": tot iets so groot soos die mens se eie eksistentialisme in sy lied "As" wat hy saam met Frazer Barry van Tribal Echo doen: "maak oop jou mind en raak onstlae van jou las / want as ons dood gaan is ons maar net as." En alhoewel hy ernstige sosiale probleme aan die strot gryp, is sy lewensuitkyk nietemin positief en sê hy aan 'n gekwelde jeug: Daar is iets jy aan jou eie omstandighede kan doen.
Wasgoedlyn Produksies het 'n Afrikaanse Musiekdokumentêre TV-reeks geskiet, waarin Churchil sterk na vore tree met onderhoude en optredes wat hom met gemak aan 'n breë publiek bekend stel. Hy is ook die gesig agter die dokumentêre film Voice behind the wall
Churchil se debuutdigbundel, Drol innie Drinkwater het in 2020 die lig gesien.
Churchil is een van die wenners van die Neville Alexander eerbewyse.
Die Media oor Churchil Naude:
Henry Cloete op Litnet:
http://www.litnet.co.za/churchil-naude-hoe-skei-mens-jou-vel-van-jou-gesig/
Koos Kombuis op Netwerk24:
http://www.netwerk24.com/vermaak/musiek/2015-06-27-die-jj-cale-van-afrikaanse-kletsrym
Kontak Churchil Naude direk. Jou boodskap sal per e-pos gestuur word.
