Eerste Straatspresident van Oranje-B en Stigter van die Federasie vir Wrokke Plus (FW+)

Coenie Müller is op 14 Oktober 1972 in Welkom gebore, waar hy volgens familiebronne reeds op driejarige ouderdom sy eerste formele klagte teen die wêreld ingedien het nadat sy ouer broer die laaste koeksister gevat het.

Hy het sy skoolloopbaan aan Hoërskool President Steyn voltooi, waar hy uitgeblink het in Geskiedenis, Rugby en die vermoë om nog steeds in 1994 kwaad te wees oor 'n skeidsregterbeslissing uit 1988.

Na matriek het Coenie vir twee jaar probeer ingenieurswese studeer, maar die verhouding tussen teorie en werklikheid het hom so ontstel dat hy die akademie verlaat het ten gunste van die Universiteit van die Lewe (UVDL), waar hy later 'n ere-doktorsgraad in Toegepaste Verontwaardiging sou ontvang.

Gedurende sy twintigerjare het Coenie verskeie beroepe beoefen, insluitend versekeringsmakelaar, verkoopsbestuurder, amateurgeskiedkundige en voltydse kenner van hoe dinge vroeër beter was.

Vriende beskryf hom as 'n vriendelike man met 'n sagte hart, 'n ferm handdruk en 'n buitengewone vermoë om enige gesprek binne drie minute terug te lei na iets wat iemand iewers in die verlede verkeerd gedoen het.

Volgens sy vrou, Elna, het sy politieke ontwaking plaasgevind nadat hy eendag besef het dat verskillende mense verskillende geskiedenisse onthou.

"Daardie aand het hy nie geslaap nie," onthou sy. "Hy het net aanhoudend gesê: 'Maar wat van óns?'"

Hierdie vraag sou later die grondslag vorm van sy politieke filosofie.

In 2026 stig Coenie die Federasie vir Wrokke Plus (FW+), 'n beweging wat daarop gemik is om historiese griewe vir toekomstige geslagte te bewaar.

Die party se suksesvolste beleidsvoorstel tot dusver is die stigting van Oranje-B, Suid-Afrika se eerste volkstraat.

Onder Coenie se leiding het Oranje-B vinnig gegroei tot 'n gemeenskap van 17 huise, drie Hilux-bakkies, twee worshonde en een historiese spoedhobbeltjie.

Hy dien tans as Eerste Straatspresident, Minister van Geskiedenis, Waarnemende Minister van Toekomstige Griewe en voorsitter van die Oranje-B Komitee vir Strategiese Braaivleisbeplanning.

Ondanks sy politieke loopbaan bly Coenie nederig.

Hy ry steeds dieselfde Hilux as tien jaar gelede, alhoewel die Hilux volgens hom intussen onafhanklikheid van die res van die voertuig verklaar het.

Wanneer hy nie besig is om die volkstraat te regeer nie, geniet hy visvang, rugby kyk en die versameling van historiese gebeure wat volgens hom "nie genoeg aandag kry nie".

Sy gunsteling aanhaling bly:

"Die verlede behoort nie agter ons te wees nie. Anders hoe gaan ons dit aanhoudend voor ons hou?"

Volgens die jongste UVDL-meningspeiling geniet Coenie tans 'n goedkeuringsgradering van 94%.

Die oorblywende 6% woon in die straat oorkant Oranje-B.